صنفنى شكراً - كوميديا سوداء

زعلوا علشان بقول احنا ناس زى الفل بس  مجتمع مريض منفسن ..!! 
حالة من الانقسام والاستقطاب قاربت على العام وأراها قاسمة لظهور الجميع وضاق الصدر أكثر وأكثر وضاقت تلك البقعة الخضراء التى كانت تجمعنا لتفصلنا أكثر وتفرقنا أكثر ...
جربت أجمّع التصنيفات اللى بتتقال فى الشارع السياسي المصرى وحتى بين العوام وبعض لقيت نفسى وانا بكتب بصنف !!!
إيه دا هو انا قولت شارع سياسي وعوام !! مقولتش بين المصريين ليه يا ترى !! علشان مشاكلنا الاجتماعية والنفسية كشعب لا حصر لا لها وعايشين وبنضحك وزى الفل ..
عارف انى غم وعارف ان النضارة السودا واضحة اوى دلوقتى على وشى أو زى ما انت شايفها ، بس احنا شعب جميل بعشق تكوينه وبحب أشوفه بحقيقته اللى مش هيغيرها النكران ودفن الرؤوس فى الرمال .... هيغيرها ويخليها حلوة زيادة لما نواجه الحقيقة ونحسن نفسنا ...
= صنفنى شكراً ... فى السياسية :
بنصنف بعض بشكل جميل اوى بس حاول تعد التصنيفات دى كدا هتلاقينا كتير جداً ..
* اخوانى
- خلايا اخوانية نايمة
-اخوان بشرطة
* سلفى  
- سلفية جهادية
- سلفية اسكندرية
- سلفى متحزبين
* علمانى
* ليبرالى
* اشتراكى
- اشتراكى ثورى
* ناصريين
* فلول
* شيوعي
* ماركسي
= صنفنى شكراً .. تصنيف دينى
* مسلم
* مسيحى
* ملحد
* لادينى
* شيعى
* بهائى
= صنفنى شكراً .. تصنيف اجتماعى مريض  وتصنيفات أخرى زى الطبيقية وتستخدم سياسياً ..
* أغنياء
* فقراء
* بلطجية
* أطفال شوارع
* معاقين
* عواطلية
= صنفنى شكراً ...
بس وانت بتصنفنى أبوس ايديك وقف التصنيف عندك انت وبلاش تورثه للى جاى بعدك بلاش تضرب فى عمق البلد وتقسمها وتشقها زيادة ... اعمل كل دا بما لا يخالف دينك يا سيدى وبما يكفل حقوق الآخرين اللى دينك نص عليها كمان ....
انت زعلان !!! معلش دى ا لحقيقة احنا بنموت فى التصنيفات والأمراض الاجتماعية المتغلغلة فينا ... شوف معايا الأمثلة دى ..
* وانت واقف مع اتنين تلاته مش اصحابك أول لما بتسيبهم ولو كنتوا بتتكلموا فى موضوع وانت اختلفت معاهم أول حاجه هتيجى فى بالك انهم هيكملوا كلام عليك بعد ما تمشى !!! مرض اجتماعى مستفحل

* صاحبك اللى مشفتوش من عشر سنين معدى عليك بعربية لاند كروزر ودايس بنزين على الآخر ومأخدش باله منك فمسلمش عليك هزيت راسك وبتقول فى سرك "هه .. الله يرحم لما كان بينادى عليه يسأل على سيجارة "، واحد وراك بيقول لصاحبه تلاقى أمه اللى جايبهاله والواد يا عينى طالع عين اللى جابوه فى السعودية علشان يأجر عربية يتنزل بيها مصر !!! تشويه

* اتقدم يخطب أختك واحد ما من عائلة ما ... أول سؤال !! مرتاحين !! عنده شقة !! أغنية يعنى !! تصنيف طبقى.

* قال رأيه فى السياسة وعجبه وزير ... دا خلايا نايمه .. دا خروف .. دا اخوان بشرطة ...

* شتم فى الاخوان وف مرسى واللى جابوه ... دا فلول ... دا خروف عبدالناصر

كفاية نضيق على نفسنا البقعة الخضرا اللى بتجمعنا ، بلاش نفتت نفسنا ، عايزكم بس تعرفوا انكم مهما قدرتوا تصنفوا وتشوهوا هتنسوا ناس تانيين بتضرب الحيرة رؤسهم فى اليوم ألف مرة ومحتارين بين آه وبين لأ وبين الصح والغلط ، وبين البطن الفاضية بكرامه ولا المهانة وعيشة الذل بالحرام ونملى التنك ...

ايه يا بلد مقسومة على 90 مليون ليه متخلوش القسمة على واحد !!!
كل الشعب ÷ 1 مصرى = مصرى ,,, واتبعها يا سيدى بالتصنيف اللى انت عايزه بس متجردوش من حبه لبلده ومصريته علشان تصنفه على هواك ..